ఇల్లంతకుంట మండలంలో అభివృద్ధి పరుగులు.. ఎమ్మెల్యే కవ్వంపల్లి సుడిగాలి పర్యటన!
న్యూస్ పవర్ , 19 ఫిబ్రవరి, ఇల్లంతకుంట:
మానకొండూర్ నియోజకవర్గంలో అభివృద్ధి పనులు ఊపందుకున్నాయి. మానకొండూర్ శాసనసభ్యులు డాక్టర్ కవ్వంపల్లి సత్యనారాయణ గురువారం ఇల్లంతకుంట మండలంలో సుడిగాలి పర్యటన జరిపారు. ఈ పర్యటనలో భాగంగా మండలంలోని పలు గ్రామాల్లో కోట్లాది రూపాయల వ్యయంతో చేపట్టనున్న అభివృద్ధి పనులకు ఆయన శంకుస్థాపనలు చేయడంతో పాటు, పూర్తయిన భవనాలను ప్రారంభించారు.
గ్రామాల వారీగా ఎమ్మెల్యే ప్రారంభించిన, శంకుస్థాపన చేసిన పనుల వివరాలు ఇలా ఉన్నాయి:
ఇల్లంతకుంట కేంద్రంలో..
రూ. 31 లక్షల వ్యయంతో అంబేడ్కర్ చౌరస్తా సుందరీకరణ, విగ్రహ పునర్నిర్మాణ పనులకు శంకుస్థాపన.
రూ. 10 లక్షలతో నిర్మించనున్న జూనియర్ కళాశాల ప్రహరీ గోడకు భూమిపూజ.
రైతు వేదిక ప్రహరీ గోడ నిర్మాణ పనులకు శంకుస్థాపన.
అనంతగిరిలో..
గ్రామస్తుల చిరకాల వాంఛ అయిన వంతెన నిర్మాణానికి శ్రీకారం. రూ. 1.5 కోట్ల భారీ వ్యయంతో చేపట్టనున్న ఈ పనులకు ఎమ్మెల్యే శంకుస్థాపన చేశారు.
రేపాకలో..
గ్రామంలో రూ. 20 లక్షలతో నూతనంగా నిర్మించిన ఆరోగ్య కేంద్ర భవనం ప్రారంభోత్సవం.
రూ. 9 లక్షల వ్యయంతో నిర్మించిన అంగన్వాడీ భవనాన్ని కూడా ఎమ్మెల్యే ప్రారంభించారు.
సోమారంపేటలో..
ప్రయాణికుల సౌకర్యార్థం రూ. 4 లక్షలతో బస్ షెల్టర్, మరియు రూ. 4 లక్షలతో హనుమాన్ టెంపుల్ హాల్ నిర్మాణ పనులకు శంకుస్థాపన.
ఎస్సీ కాలనీలో నూతనంగా ఏర్పాటు చేసిన హైమాస్ లైట్లను ప్రారంభించారు.
వెంకట్రావుపల్లి & గూడెపుపల్లిలో..
వెంకట్రావుపల్లిలో రూ. 12 లక్షలతో నిర్మించనున్న అంగన్వాడీ భవన పనులకు శంకుస్థాపన.
గూడెపుపల్లిలో రూ. 20 లక్షల వ్యయంతో సకల హంగులతో నిర్మించిన నూతన గ్రామపంచాయతీ భవనాన్ని డాక్టర్ సత్యనారాయణ ప్రారంభించారు.
ఈ విస్తృత పర్యటనలో ఇల్లంతకుంట మండల కాంగ్రెస్ అధ్యక్షుడు కోమటిరెడ్డి భాస్కర్ రెడ్డి, మాజీ మండలాధ్యక్షులు ఊట్కూరి వెంకటరమణారెడ్డి, ఐలయ్య తదితరులు పాల్గొన్నారు. అలాగే పార్టీ నాయకులు పసుల వెంకటి, ఐరెడ్డి మహేందర్ రెడ్డి, ఎలగందుల ప్రసాద్, తీగల భాగ్యలక్ష్మి, జ్యోతి, సర్పంచులు మామిడి రాజు, నేరెళ్ల విజయ్, కేతిరెడ్డి భారతీ లక్ష్మారెడ్డి, చల్ల నవీన్ రెడ్డితో పాటు ఆయా గ్రామాల పార్టీ అధ్యక్షులు, కార్యకర్తలు పెద్ద ఎత్తున హాజరై కార్యక్రమాలను విజయవంతం చేశారు.
