మిత్రుని జ్ఞాపకార్థం క్రికెట్ టోర్నమెంట్
• గెలుచుకున్న నగదును కుటుంబానికే అంకితం చేసిన 'పోచమ్మ టీం'
న్యూస్ పవర్ , 15 జనవరి , ఇల్లంతకుంట:
క్రీడలు స్నేహభావానికి ప్రతీక అని, గెలుపు కంటే మానవత్వం గొప్పదని సోమారంపేట యువకులు నిరూపించారు. స్థానిక సోమారంపేట గ్రామంలో దివంగత గొట్టం నవీన్ జ్ఞాపకార్థం, 2012-2013 SSC బ్యాచ్ మిత్ర బృందం ఆధ్వర్యంలో నిర్వహించిన క్రికెట్ టోర్నమెంట్ ఆద్యంతం ఆసక్తికరంగా సాగింది.
ఈ టోర్నమెంట్లో అత్యుత్తమ ప్రతిభ కనబరిచిన 'పోచమ్మ టీం' ఫైనల్స్లో విజయం సాధించి ప్రథమ బహుమతిని కైవసం చేసుకుంది. విజేతగా నిలిచిన జట్టుకు నిర్వాహకులు రూ. 5,016/- నగదు పురస్కారాన్ని అందజేశారు.
అయితే, పోచమ్మ టీం సభ్యులు తమ పెద్ద మనసును చాటుకున్నారు. తాము గెలుచుకున్న రూ. 5,016 నగదు బహుమతిని తమ సొంత అవసరాలకు వాడుకోకుండా, తమ మిత్రుడు స్వర్గీయ నవీన్ కుటుంబ సభ్యులకు అందజేశారు. క్రీడల్లో గెలవడమే కాదు, కష్టంలో ఉన్న మిత్రుని కుటుంబానికి అండగా నిలిచి మనసులను కూడా గెలుచుకోవచ్చని పోచమ్మ టీం నిరూపించింది. ఈ కార్యక్రమంలో పోచమ్మ టీం సభ్యులు, 2012-13 SSC బ్యాచ్ మిత్రులు మరియు గ్రామస్తులు పాల్గొన్నారు. ఈ సందర్భంగా పోచమ్మ టీం సభ్యులను పలువురు అభినందించారు.
